Ош шаарында селдин кесепеттерин жоюу боюнча иштер жүрүп жатат. Өзгөчө кырдаалдар министрлиги Зымырык-Сая аймагындагы абал тууралуу маалымат берди, анда Ак-Буура — Араван каналы аркылуу сел жүрүп, Сайдиев көчөсүндөгү бала бакчанын короосун суу каптап, жолдордун кээ бир бөлүктөрүнө зыян келтирди.
Селдик агым ошондой эле Daewoo Matiz жеңил унаасын алып кетти, анын ичинде адам болгон. Бактыга жараша, жергиликтүү тургундар ыкчам реакция кылып, жаранды куткарууга жетишишти, ал эми унаа суудан чыгарылды.
Кырсыктын кесепеттерин жоюуда 57 адам жана 7 бирдик атайын техника иштеп жатат. Учурда жабыркаган аймактарды тазалоо жана калыбына келтирүү боюнча иштер улантылууда.